iManouna

يرجع لِنا لبنان…. لبناني – الاب طوني بو عساف

بليلة عتم والناس برداني
وأرض الشرق للحبّ عطشاني

والغيم لفلف شرشفو وهربان
وكانت نجوم الليل نعساني
طلّ الملاك وبشّر الرعيان
قومو فرحو في خير ربّاني

بمذود فقير بيولد الرحمان
الطفل الإله بجسم إنساني
يوسف بصمتو يخشع بإيمان
ومريم النعمه حضور ملياني

قطعو المجوس سهول مع وديان
ونجمه منسّكي وبعيد سهراني
تدلّن عا مطرح ما الطفل غفيان
بإيدن هدايا كتير حرزاني

وجوق الملاكي يرتّل الألحان
عجقو السما تراتيل وغناني
عندي طلب يا خالق الاكوان
صار الوطن موجوع بيعاني

لبنان جنّة معلّقه وعلقان
ما بين اربعتعش وتماني
إمسح الدمعه وبدّد الأحزان
ردّ الرجا عا نفوس يئساني

عزّي الحزانى وبلسم الوجدان
إشفي الوجع بقلوب تعباني
حرّر بلادي وكسّر التيجان
ردّ البصر عا عيون عمياني
انشالله العيد بيجمع الاخوان
وطفل المغارة يرجّع اللي كان
ويرجع لِنا لبنان لبناني

الخوري طوني بو عساف – ايماننا

Related posts

في لبنان : حلق شعر رأسه ليواسي صديقه المصاب بالسرطان… اليكم الوفاء

imanouna imanouna

بعض الأفكار لتكريم قلب يسوع المقدس في المنزل خلال هذا الشهر المقدس

imanouna imanouna

كيف توزعت إصابات كورونا الجديدة على المناطق؟

imanouna imanouna